Romans 16
Paulaꞌke Mmauꞌ Nantoong Tampaꞌ Tang Nauvuruꞌnaꞌ
1Diiꞌ ninge naurampimang ani niiꞌmari Piibiiꞌ tampaꞌ noruꞌeriaing. Ani teni pakupakunani dootuuꞌnupoong-koo teke Siekuria-namono-koo. 2Tampaꞌ onkeonkeꞌeriaing onkeonkeꞌeemanaꞌ Kumponing bakaning meekupoong, eeꞌnoko pakueriaing teni kapooꞌ piavoaining-koo, aiꞌ teni teni eeꞌnani pakupaku nantoong karikaꞌkoo, eeꞌnoko ning-koo teeꞌ nariꞌ. 3Nauereriaing tering Pirisikaꞌdaring Akuila nkaang doturotu tering-koo, nariꞌ Jiisuuꞌ Karistooꞌkoo mintoomarimanaring-koo. 4Kuru totoꞌkoo avororeaꞌ pakumuretuꞌ domang-antamurema. Ning narunge tampaꞌ tang-koo makosi deeaꞌ tering-koo teka ookara dootuuꞌnupoong osi kante-koo tampara tampaavaing, Juꞌdeeaing-kooninge. 5Nauereriaing nkaang doturotu teing dootuuꞌnupoong tering beekanavaꞌkoo kuneꞌeemaing. Napoꞌ naueriai tee Epinitas nkaang doturotu, mmaikoꞌ masikung, tee eeꞌnara tutunaꞌnung Eesia-nupoong-koo Karistooꞌaape bereꞌaruꞌnung. 6Napoꞌ doturotu nkaang teni-koo Meeriꞌkoo diiꞌkoo aaꞌnaꞌ kakeꞌiinani. 7Doturotu napoꞌ tenaanka-koo Antoronaikas naanka Junias, ning-pinaꞌ Juꞌkoonaanka eeꞌnoko nariꞌ daiꞌnisira. Tenaanka Kumponing-nung kara-okovuresi-nkara miring pankaing-poꞌnaanka. Ning mmeꞌ bereꞌmaravaruko tenaanka tutung bereꞌaretuꞌnaanka Karistooꞌkoo. 8Doturotu tee-koo Ampilietas, mmaikoꞌ masikung Ovoring-koo. 9Napoꞌ doturotu tee-koo Ebanus nariꞌ mintoomarimaung Karistooꞌkoo, eeꞌnoko napoꞌ tee mmaikoꞌ masikung Sitekis. 10Doturotu napoꞌ tee-koo Apelis, Karistooꞌ kakeꞌiiari siompumaung. Napoꞌ doturotu teing-koo Aristabiulas baurukaaꞌkoo. 11Napoꞌ doturotu tee-koo Erodion, niꞌninka nariꞌ Juꞌnung. Napoꞌ doturotu Ovoring-koo teing-koo teni Nasisis baurukaaꞌkoo. 12Napoꞌ doturotu tenaanka manikumaara-koo Ovoring-koo mintoomparemanaanka-koo Taraipina eeꞌnoko Taraiposaꞌ. Napoꞌ tee Peesis, mmaikoꞌ, aaꞌnaꞌ mintoomparamaung Ovoring-koo. 13Doturotu tee-koo Ruupasi, pankaing Ovoring-koo, eeꞌnoko teni bauko, napoꞌ ninge teeꞌ, nkoꞌke. 14Napoꞌ doturotu teing-koo Asinkiritas, Pilikon, Eemis, Patorobas eeꞌnoko Eemas eeꞌnoko teing mmaikoriꞌ nariꞌ otoromaing. 15Doturotu napoꞌ aing-koo: Pilolokasi, teni Julia, Nerias eeꞌnoko teni baꞌmari. Napoꞌ Olimpas eeꞌnoko ookara Kumponing bakaning meekupoong teing ninka nariꞌ otoromaing. 16Ookara doturotu-antareeriaing onkeonkeꞌdeerima. Karistooꞌ bakaning dootuuꞌnupoong napoꞌ ameensiꞌkooninge ookara osi kante-ita doturotu nauraarimaang.Asiꞌnaare Tautau
17Enang tee bakei koontoꞌ naurampimang diiꞌ mmaikoriꞌ: Oorariri otoriaing teing-koo diiꞌ totoꞌanta-koo eeꞌnoko poreꞌanta-koo piavoroi otoroining-koo tee kara tero taaraveruꞌnung beiꞌbeiꞌaama. Dontaꞌdariri otoriai teing-eta. 18Nantoong teeꞌ oroꞌnukai tee niikaang Ovoring Karistooꞌ siompaavaꞌ, biikaang pia narung siompaamaung. Tampaꞌ nariꞌ kareaama eeꞌnoko opampaarima tosiaarimaung teing amakoori domang-koo. 19Diiꞌ teing kara meumperimaing deentariko ookarai tampaꞌ noruꞌdaari otong eeꞌnoko ning napoꞌ teeꞌkoo dotumaramaunge. Nka ninge diiꞌ tampaꞌ mataurariri otoꞌkoo pia-antarampimang tampaꞌ nariꞌ nko-koo. Orakaꞌ nko-koo amako-pinaꞌ otoriai. 20Teeꞌ nariꞌ nkorariko tenang Kumponinge mooa-poꞌnunge Sietaniꞌ namuꞌke diiꞌkoo kauꞌkoo boonavete-koo mmeꞌuai. Tee biraanke niikaang Ovoring Jiisuuꞌ Karistooꞌ bakaang diiꞌ ninka nariꞌ otomatoaing. Eeꞌ, masikung.Paulaꞌke Siꞌnooraꞌuruꞌnaꞌ
21Timotiꞌke niꞌninka nariꞌ mintoomaremaunge tampaꞌ tanterurimang, napoꞌ Lusias dovange Jeesoni eeꞌnoko Sosipata, niꞌninka namuuꞌkooninge. 22Ninge eeꞌnarai Tesiesie aung karavoto~ daariansinunge tampara tanterompimang Ovoring ninka. 23Teie Gaiasie niiꞌ ookara dootuuꞌnupoong anke tanatamurimaunge tampara tanturimaang. Napoꞌ Erasitasie osi-koong mooniꞌ tarevumaunge eeꞌnoko tee niiꞌmaikoꞌ Kuotasie tenaankai tampara tantaarimaang. 24Niikaang Ovoring Jiisuuꞌ Karistooꞌke diiꞌ ookara piaaruri tampaꞌ pakururiaing. Teeꞌ eeꞌnaꞌ.Paulaꞌke Kumponing Daangang-koo Pia-antavuruꞌnaꞌ
25Enang tee daangampampimaatoaing Kumponing diiꞌ tampaꞌ donkong-antaruri otoaing teeꞌ nariꞌ teie doorenang tamparai minkuvumanaꞌ nauaramaunge Jiisuuꞌ Karistooꞌ siraꞌpama. Teie doorenang tamparai tee kapooꞌ makensiꞌnung teroita makempari otouꞌnung enang sirapoꞌ poꞌantavuing; 26Kumponinge teeꞌ nariꞌ otoi otomaunge botovuioꞌ siraꞌparing ookara amutemuriiꞌ nantoong-koo, teinge masikaꞌantavaara siompaavaꞌnaang. Aung tee nakaro-nupoonge Daari Meekung-koo minkuauꞌnung. 27Kumponing tee meenasi okovenung, eeꞌnara baka norukasiꞌ daangampampimaatoaing Jiisuuꞌ Karistooꞌke pakumurioꞌ. Eeꞌ, masikung.
Copyright information for
NAS